அஸ்ஸலாமு அலைக்கும் வரஹ்.. VKALATHUR.IN இணையதளம் தங்களை அன்புடன் வரவேற்கிறது...





நம் உடலில் சிகரெட் எந்த அளவிற்குப் பாதிப்பை ஏற்படுத்துகிறதோ, அதே அளவு பொருளாதாரத்தில் மிகப் பெரிய ஓட்டையைப் புகையிலை ஏற்படுத்துகிறது. 30 வயதுடைய ஒரு நபர், ஒரு நாளைக்கு 5 சிகரெட்களைப் பிடித்தால், 60 வயதில் அவர் ஓய்வு பெறும் போது ரூ.1 கோடி நஷ்டப்பட்டிருப்பார். இந்த "உலக புகையிலை எதிர்ப்பு தினம்" அன்று புகையிலையால் ஒரு சராசரி மனிதனுக்கு ஏற்படும் இழப்பைப் பற்றிப் பார்க்கலாம்.





1. சிகரெட்டால் ஏற்படும் செலவு:

இந்தச் செலவுதான் நம் பொருளாதாரத்தில் அதிகளவு தாக்கத்தை ஏற்படுத்துகிறது. ஒரு சீகரெட்டின் விலை ரூ.10 முதல் ரூ.15 வரை இருக்கும். ஆனால், ரூ.12 ஆக வைத்துக் கொள்வோம். ஒரு நாள் 5 சிகரெட்களைப் பிடிப்பவருக்கு ஏற்படும் செலவு ரூ.60. ஒரு மாதம் செல்வு ரூ.1,800. ஒவ்வொரு வருடமும் இது 8% அதிகரிக்கிறது என பார்த்தால், 30 வருடத்தில் நம் செலவு மட்டும் ரூ.24.47 லட்சம். இந்தத் தொகையை நாம் 9 சதவிகிதத்தில் முதலீடு செய்தால் ரூ.69.23 லட்சம் பணத்தைப் பெறலாம். ஆனால், அதை நாம் இழந்து கொண்டு இருக்கிறோம்.

(இது நிரந்தரமான விலை அல்ல. வருடந்தோறும் சராசரி 20% வரை சிகரெட் விலை அதிகரிக்கிறது. நாம் 8% விலை உயர்வை standard ஆக வைக்கிறோம்).

2. மருத்துவச் செலவு:

சிகரெட் பெட்டிகளிலும், விளம்பரங்களிலும் காட்டப்படும் அபாயகரமான, கொடூரமான நோய்களுக்கு எல்லாரும் ஆட்படவில்லை என்றாலும் சிறு சிறு பிரச்சனைகள் வந்து கொண்டேதான் இருக்கும். நுரையீரல் சம்பந்தமான பிரச்சனைகள் அதிகளவு ஏற்படும். மாரடைப்பு, புற்றுநோய் முதலியனவும் வருவதற்காக வாய்ப்புகள் அதிகம். இதற்கான மாதாந்திரச் செலவு மாதம் ரூ.400 என வைத்துக் கொள்ளலாம். ஓர் ஆண்டிற்கு 12% அதிகரித்தால், 30 வருடத்தில் ரூ.11.59 லட்சங்களைச் செலவழித்திருப்போம். இந்தத் தொகையையும் 9 சதவிகிதத்தில் முதலீடு செய்தாம் ரூ.26.7 லட்சம் பெறலாம்.

(ஆண்டுதோறும் மருத்துவச் செலவு 12% அதிகரித்து வருகிறது. இதில் 12% சராசரியாக எடுத்துள்ளோம்).

3. காப்பீட்டுச் செலவு:

காப்பீட்டாளர்கள் புகை பிடிப்பவர்களுக்கு, பிரீமியம் அதிகம் பெருகிறார்கள். காரணம் இவர்கள் நோய் வாய்ப்படுவதற்காக வாய்ப்புகள் ஜாஸ்தி. ஒருவரின் வயது, ஒரு நாள் எத்தனை சிகரெட்டுகள் பிடிக்கிறார் ஆகியவையைப் பொறுத்து ரிஸ்கின் அளவு மாறுபடும். 30 வயதுடைய ஒருவர் ரூ.1 கோடி காப்பீட்டைப் பெற மாதம் ரூ.460 அதிகப்படியாக அளிப்பார். 30 வருடத்திற்கு, ரூ.1.65 லட்சங்களைச் செலவழிக்கிறார். இதையும் 9 சதவிகிதத்தில் முதலீடு செய்தால் பெறும் தொகை ரூ.7.52 லட்சம்.

ஆக மொத்தம், ரூ.69.23 லட்சம் (சிகரெட் செலவு) + ரூ.26.7 லட்சம்(மருத்துவச் செலவு)+ ரூ.7.52 லட்சம்(காப்பீட்டுச் செலவு) = ரூ.1.03 கோடி.
இது பொருளாதார ரீதியான நஷ்டம் மட்டுமே. இதைத் தவிர, நமக்கு ஏற்படும் நஷ்டங்கள் பற்பல.

√ குடும்பம்:

ஆய்வுகளின்படி புகை பிடிப்பவர்களின் குழந்தைகளுக்கு நோய் வருவதற்கான வாய்ப்புகள் அதிகம்.
குடும்பம் எனும் பெரும் செல்வத்தை இழக்க நேரிடலாம்.

√ வாழ்க்கைக் காலம்:

புகை பிடிப்பவர்களின் சராசரி வாழ்வின் காலம் மிகவும் குறைவு. ஒரு சிகரெட் பிடித்தால் நம் வாழ்வில் 12 நிமிடங்களை இழக்கிறோம். இதை வைத்துக் கணக்குப் போட்டுக் கொள்ளலாம்!

√ வாழ்க்கைத் தரம்:

புகையிலையால் நம் வாழ்க்கைத் தரம் பாதிக்கப்படுகிறது. கடினமான வேலைகளைச் செய்ய முடிவதில்லை.

இப்படி ஒரு சிறு இன்பத்திற்காக நம் வாழ்வையே இழப்பது நியாயமா?

இதற்கு மாற்றாக நமக்கு இப்போது பல வழிகள் பிறந்துள்ளன. புகையிலையை விட்டொழிக்க வேண்டும் என எண்ணினால் மட்டுமே போதும்.



அப்படி எண்ணும் பட்சத்தில் நாம் செய்ய வேண்டிய செலவுகள்:

1. Nicotine based chewing gum:

இதை வாயில் போட்டவுடன், நம் இரத்த ஓட்டத்தில் நிகோடின் சேர்ந்துவிடும். இதனால் புகை பிடிக்கும் எண்ணம் போய்விடும். இதற்கான செலவு குறைந்தபட்சம் ரூ.100 மட்டுமே.

2. Nicotine patches:

இதை நம் உடலில் வைத்தாலே போதும். நம் இரத்த ஓட்டத்தில் நிகோட்டின் கலந்துவிடும். பிறகு சிகரெட் தேவையில்லை! செலவு வெறும் ரூ.700 மட்டுமே.

3. ஆயுர்வேத மருந்து:

இது நம் உடலில் உள்ள நஞ்சினைச் சுத்தப்படுத்தி புகை பிடிக்க வேண்டும் என்ற எண்ணத்தை வரவிடாமல் தடுக்கிறது. செலவு ரூ.500.

4. Bupropion hydrochloride மாத்திரைகள்:

இதை OTC drugs (Over The Counter) எனக் கூறுவர். இதை வாங்க மருத்துவரின் ஆலோசனையோ மருந்துச் சீட்டோ தேவையில்லை. இதை சாப்பிட்டால், நம் மூளைக்குச் செல்லும் நரம்புகளைக் கட்டுக்குள் கொண்டுவந்து சிகரெட் பிடிக்கும் எண்ணத்தை அரவே தடுத்து விடும். இதன் விலை வெறும் கிட்டதட்ட ரூ.200 மட்டுமே.

5. E-cigarettes:

இந்த சிகரெட்டுகளில் உள்ள ஒரு திரவத்தில் நிக்கோட்டின் கலந்திருக்கும். அது ஆவியாகி புகை பிடிக்கும் உணர்வை ஏற்படுத்துகிறது. இதனால் சிகரெட் பிடிக்கும் எண்ணம் குறைகிறது. இதன் விலை ரூ.700.

இப்படி பல மாற்று வழிகள் இருந்தாலும், நம் வாழ்க்கைக்கு அத்தியாவசியமான ஒன்றாக இல்லாத புகையிலைக்கு நாம் செலவு செய்வது நியாயமா எனச் சிந்தித்து பார்க்க வேண்டும். நம் வாழ்வும், நம் பணமும் நாம் எண்ணுவதைக் காட்டிலும் மதிப்பு மிக்கவை. அதை சரியான முறையில் பயன்படுத்த வேண்டும்!

ந. ஆசிபா பாத்திமா பாவா

(மாணவப் பத்திரிக்கையாளர்

0 கருத்துரைகள்:

கருத்துரையிடுக

இந்த வலைதளம் வளர்ச்சிக்கு நிறை-குறைகளை சுட்டி காட்டவும்.உங்கள் வருகைக்கு ரோம்ப நன்றி.

 
Top
-