அஸ்ஸலாமு அலைக்கும் வரஹ்.. VKALATHUR.IN இணையதளம் தங்களை அன்புடன் வரவேற்கிறது...





நடந்து முடிந்துள்ள தமிழக சட்டமன்றத் தேர்தலில் அதிகார பலம், பண பலம், ஓரவஞ்சனையுடன் செயல்பட்ட தேர்தல் ஆணையத்தின் துணையுடன் தேர்தலை சந்தித்த அதிமுகவை விட 1.2 சதவீதம் வாக்குகள் மட்டுமே குறைவாகப் பெற்று திமுக கூட்டணி சாதனைப் படைத்துள்ளது. கடந்த சட்டமன்றத் தேர்தலில் எதிர்க்கட்சி நிலைகூட இல்லாத திமுக இன்று மிகப்பெரும் எண்ணிக்கையில் எதிர்க்கட்சியாக உருவாகி இருக்கின்றது. இந்த நிலையை உருவாக்கிட திமுக தலைமையிலான கூட்டணிக்கு வாக்களித்த அனைத்து நல்லுள்ளங்களுக்கும் மனிதநேய மக்கள் கட்சியின் சார்பில் என் நெஞ்சார்ந்த நன்றியை தெரிவித்துக் கொள்கிறேன்.

சிறப்பான கூட்டணியை அமைத்து அதனை சீரிய முறையில வழிநடத்திய திமுகவின் தலைவர் கலைஞர் அவர்களுக்கும், தனது கடும் உழைப்பால் களத்தை வலுப்படுத்திய திமுக பொருளாளர் சகோதரர் மு.க.ஸ்டாலின் அவர்களுக்கும் மற்றும் கூட்டணி கட்சித் தலைவர்களுக்கும் என் நெஞ்சார்ந்த நன்றியைத் தெரிவித்துக் கொள்கிறேன்.

100 சதவீதம் வாக்கு எண்ணிக்கையை அடைவோம் என்ற நல்ல முழக்கத்துடன் செயல்பட்டாலும் தேர்தலில் வாக்களிப்பதற்கு பணம் கொடுத்து ஜனநாயகப் படுகொலை நடப்பதை தேர்தல் ஆணையத்தால் தடுக்க முடியாதது வேதனைக்குரியது.

நாங்கள் ஆற்றும் பல்வேறு மக்கள் சேவைப் பணிகளில் ஒன்றுதான் அரசியல் பணி. இந்தத் தேர்தலில் மனிதநேய மக்கள் கட்சி போட்டியிட்ட நான்கு தொகுதிகளிலும் வெற்றி வாய்ப்பை இழந்தாலும் எமது சேவை தன்னலமின்றி அனைத்து மக்களுக்கும் வீரியத்துடன் அயராது தொடரும். மனிதநேய மக்கள் கட்சி போட்டியிட்ட நான்கு தொகுதிகளிலும் எவ்வித ஆசாபாசங்களுக்கும் இடம் கொடுக்காமல் எமது வேட்பாளர்களுக்கு வாக்களித்த அனைவருக்கும் எனது நெஞ்சார்ந்த நன்றியைத் தெரிவித்துக் கொள்கிறேன்.

ஆறாவது முறையாக முதலமைச்சராகப் பொறுப்பேற்கும் செல்வி ஜெயலலிதாவிற்கு மனிதநேய மக்கள் கட்சியின் சார்பாக எனது வாழ்த்துக்களை தெரிவித்துக் கொள்கிறேன். அதிமுகவின் தேர்தல் அறிக்கையில் குறிப்பிடப்பட்டுள்ள வாக்குறுதிகளை குறிப்பாக மதுவிலக்கு தொடர்பான வாக்குறுதியை நிறைவேற்ற அவர் உடனடியாக நடவடிக்கை எடுக்க வேண்டும் என்று கேட்டுக் கொள்கிறேன்.


(ஒப்பம்) எம்.எச்.ஜவாஹிருல்லா
தலைவர்,
மனிதநேய மக்கள் கட்சி

0 கருத்துரைகள்:

கருத்துரையிடுக

இந்த வலைதளம் வளர்ச்சிக்கு நிறை-குறைகளை சுட்டி காட்டவும்.உங்கள் வருகைக்கு ரோம்ப நன்றி.

 
Top
-